ក្រុមប្រឹក្សាភិបាលនៃ វ.គ.ស.ក. ដឹកនាំដោយប្រធាន ១ (មួយ) រូប និងអនុប្រធាន ១ (មួយ) រូបជាជំនួយការ។ ប្រធាន អនុប្រធាន និងសមាជិកនៃក្រុមប្រឹក្សាភិបាលត្រូវជ្រើសរើសចេញពីសមាជិក  វ.គ.ស.ក. តាមរយៈនៃការបោះឆ្នោតនៅក្នុងមហាសន្និបាត លើកលែងតែសមាសភាពដែលជា តំណាងពីស្ថាប័នដូចបានចែងក្នុងមាត្រា ៩ នៃអនុក្រឹត្យនេះ។ ប្រធាន អនុប្រធាន និងសមាជិកនៃក្រុមប្រឹក្សាភិបាលរបស់ វ.គ.ស.ក. ត្រូវបានតែងតាំងដោយ ប្រកាសរបស់រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ។

ក្រុមប្រឹក្សាភិបាលនៃ វ.គ.ស.ក. មានមុខងារនិងភារកិច្ច ដូចខាងក្រោម៖

• ពិនិត្យនិងអនុម័តបទបញ្ជាផ្ទៃក្នុងរបស់ វ.គ.ស.ក.
• ពិនិត្យនិងអនុម័តលើសេចក្តីព្រាងក្រមសីលធម៌វិជ្ជាជីវៈគណនេយ្យករនិងសវនករ
• ពិនិត្យនិងអនុម័តវិធានគ្រប់គ្រងនានារបស់ វ.គ.ស.ក.
• ពិនិត្យនិងអនុម័តលើគោលនយោបាយ និងវិធានការនានាដែលរៀបចំឡើងដោយលេខាធិការដ្ឋាននៃ វ.គ.ស.ក.
• ពិនិត្យនិងអនុម័តលើផែនការយុទ្ធសាស្ត្រនិងគម្រោងថវិកាប្រចាំឆ្នាំដែលរៀបចំឡើងដោយលេខាធិការដ្ឋាននៃ វ.គ.ស.ក.
• តាមដាន ត្រួតពិនិត្យ និងវាយតម្លៃលើការអនុវត្តគោលនយោបាយ ផែនការយុទ្ធសាស្ត្រ និងផែនការថវិកាប្រចាំឆ្នាំរបស់ វ.គ.ស.ក.
• ផ្តល់ការយល់ព្រមលើរបាយការណ៍លទ្ធផលការងារនិងរបាយការណ៍ហិរញ្ញវត្ថុប្រចាំឆ្នាំរបស់ វ.គ.ស.ក.
• សម្រេចតែងតាំង ព្យួរការងារ និងបញ្ឈប់់ការងាររបស់នាយកប្រតិបត្តិ និងកំណត់លាភការផេ្សងៗរបស់នាយកប្រតិបត្តិ
• សម្រេចលើគោលការណ៍ជ្រើសរើសបុគ្គលិករបស់លេខាធិការដ្ឋាននៃ វ.គ.ស.ក.
• សម្រេចលើរចនាសម្ព័ន្ធគ្រប់គ្រងរបស់លេខាធិការដ្ឋាននៃ វ.គ.ស.ក.
• ពិនិត្យនិងសម្រេចលើការបង្កើតគណៈកម្មការ អនុគណៈកម្មការ និងក្រុមការងារនានា ស្របតាមតម្រូវការចាំបាច់របស់ វ.គ.ស.ក.
• រាយការណ៍ជាលាយលក្ខណ៍អក្សរអំពីផែនការ គម្រោងថវិកា និងលទ្ធផលនៃការអនុវត្តផែនការ និងថវិកាមក ក.ជ.គ. និង
• ពិនិត្យនិងសម្រេចលើសំណើបើកការិយាល័យតំណាង និង/ឬសាខាតាមបណ្តាខេត្តទូទាំងព្រះរាជាណាចក្រកម្ពុជា។