រាជធានីភ្នំពេញ ថ្ងៃទី៩ ខែតុលា ឆ្នាំ២០២៦ — លោក នៅ រ៉េមី អនុប្រធានក្រុមប្រឹក្សាភិបាលនៃវិទ្យាស្ថានគណនេយ្យករជំនាញ និងសវនករកម្ពុជា (វ.គ.ស.ក.) បានចូលរួមជាមួយគណៈប្រតិភូកម្ពុជា ក្នុងកិច្ចប្រជុំលើកទី៤៣ នៃក្រុមការងារអន្តររដ្ឋាភិបាលនៃអ្នកជំនាញស្តីពីស្តង់ដារគណនេយ្យអន្តរជាតិ និងការរាយការណ៍ (ISAR 43) ដែលរៀបចំដោយសន្និសីទអង្គការសហប្រជាជាតិស្តីពីពាណិជ្ជកម្ម និងការអភិវឌ្ឍ (UNCTAD) ចាប់ពីថ្ងៃទី៣០ ខែកញ្ញា ដល់ថ្ងៃទី២ ខែតុលា ឆ្នាំ២០២៦ នៅវិមានសហប្រជាជាតិ ទីក្រុងហ្សឺណែវ ប្រទេសស្វីស។

 គណៈប្រតិភូកម្ពុជាដឹកនាំដោយ ឯកឧត្តមបណ្ឌិត ងី តាយី រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ ដោយមានការចូលរួមពីឯកឧត្តម ប៊ូ ថារិន អគ្គនាយកនៃនិយ័តករគណនេយ្យ និងសវនកម្ម (ន.គ.ស.) ថ្នាក់ដឹកនាំ និងមន្ត្រីជាន់ខ្ពស់នៃអគ្គនាយកដ្ឋានពន្ធដារ ព្រមទាំងតំណាងមកពីមជ្ឈដ្ឋានស្រាវជ្រាវ វិស័យអប់រំ និងវិស័យឯកជនកម្ពុជា រួមទាំង វ.គ.ស.ក. ផងដែរ។

 គណៈប្រតិភូកម្ពុជាក៏បានចូលរួមក្នុងកម្មវិធីកសាងសមត្ថភាពរបស់ UNCTAD នៅថ្ងៃទី២៩ ខែកញ្ញា ឆ្នាំ២០២៦ ដែលផ្តោតលើការពង្រឹងក្របខ័ណ្ឌបទប្បញ្ញត្តិ សមត្ថភាពស្ថាប័ន និងធនធានមនុស្ស ដើម្បីគាំទ្រដល់ការអនុវត្តតម្រូវការរាយការណ៍និរន្តរភាពដែលទទួលស្គាល់ជាអន្តរជាតិ។

 លទ្ធផលសំខាន់ៗនៃកិច្ចប្រជុំ

១. ការពង្រឹងសមត្ថភាពសម្រាប់ការរាយការណ៍និរន្តរភាព (ថ្ងៃទី២៩ ខែកញ្ញា ឆ្នាំ២០២៦)

កម្មវិធីកសាងសមត្ថភាពបានលើកឡើងពីសារៈសំខាន់នៃការអភិវឌ្ឍក្របខ័ណ្ឌបទប្បញ្ញត្តិប្រកបដោយប្រសិទ្ធភាព ការពង្រឹងសមត្ថភាពស្ថាប័ន និងការអភិវឌ្ឍអ្នកជំនាញដែលមានសមត្ថភាព ដើម្បីអនុវត្តតម្រូវការរាយការណ៍និរន្តរភាពដែលទទួលស្គាល់ជាអន្តរជាតិ។

កិច្ចពិភាក្សាបានសង្កត់ធ្ងន់ថា ការអនុវត្តការរាយការណ៍និរន្តរភាពប្រកបដោយជោគជ័យ ទាមទារឱ្យមានកិច្ចសហការរវាងស្ថាប័ននិយ័តកម្ម ស្ថាប័នវិជ្ជាជីវៈគណនេយ្យ សហគ្រាស គ្រឹះស្ថានអប់រំ និងភាគីពាក់ព័ន្ធនានា ដោយមានការគាំទ្រពីអភិបាលកិច្ចល្អ ព័ត៌មានដែលអាចជឿទុកចិត្តបាន និងប្រព័ន្ធត្រួតពិនិត្យផ្ទៃក្នុងប្រកបដោយប្រសិទ្ធភាព។

២. ការផ្សារភ្ជាប់រវាងរបាយការណ៍ហិរញ្ញវត្ថុ និងរបាយការណ៍និរន្តរភាព (ថ្ងៃទី៣០ ខែកញ្ញា ដល់ថ្ងៃទី២ ខែតុលា ឆ្នាំ២០២៦)

ប្រធានបទសំខាន់មួយនៃកិច្ចប្រជុំ ISAR លើកទី៤៣ គឺការពង្រឹងការផ្សារភ្ជាប់រវាងរបាយការណ៍ហិរញ្ញវត្ថុ និងការបង្ហាញព័ត៌មានស្តីពីនិរន្តរភាព ដែលរួមមានព័ត៌មានពាក់ព័ន្ធនឹងការប្រែប្រួលអាកាសធាតុ បរិស្ថាន សង្គម និងអភិបាលកិច្ច។

កិច្ចពិភាក្សាបានសង្កត់ធ្ងន់ពីសារៈសំខាន់នៃការរាយការណ៍ដែលមានភាពស៊ីសង្វាក់គ្នា អាចជឿទុកចិត្តបាន និងមានការផ្សារភ្ជាប់គ្នា ដើម្បីគាំទ្រដល់ការសម្រេចចិត្តផ្នែកវិនិយោគ និងហិរញ្ញប្បទានប្រកបដោយព័ត៌មានគ្រប់គ្រាន់ ព្រមទាំងលើកកម្ពស់តម្លាភាព គណនេយ្យភាព និងការអភិវឌ្ឍសេដ្ឋកិច្ចប្រកបដោយចីរភាព។

កិច្ចសហប្រតិបត្តិការអន្តរជាតិ និងការធ្វើសុខដុមនីយកម្មស្តង់ដាររាយការណ៍ ក៏ត្រូវបានលើកឡើងថាជាកត្តាសំខាន់ក្នុងការពង្រឹងគុណភាព ភាពអាចប្រៀបធៀបបាន និងភាពជឿទុកចិត្តនៃរបាយការណ៍របស់សហគ្រាស។

៣. ការពង្រឹងគណនេយ្យ និងការរាយការណ៍ហិរញ្ញវត្ថុសម្រាប់សហគ្រាសធុនមីក្រូ តូច និងមធ្យម (MSMEs)

ប្រធានបទសំខាន់មួយទៀតនៃកិច្ចប្រជុំ គឺការពិភាក្សាអំពីតម្រូវការផ្នែកគណនេយ្យ និងការរាយការណ៍ហិរញ្ញវត្ថុសម្រាប់សហគ្រាសធុនមីក្រូ តូច និងមធ្យម។

កិច្ចប្រជុំបានសង្កត់ធ្ងន់លើសារៈសំខាន់នៃការរៀបចំស្តង់ដារ និងតម្រូវការរាយការណ៍គណនេយ្យដែលមានភាពសាមញ្ញ និងសមស្របទៅនឹងទំហំ និងសមត្ថភាពរបស់សហគ្រាស ដើម្បីពង្រឹងការគ្រប់គ្រងហិរញ្ញវត្ថុ បង្កើនលទ្ធភាពទទួលបានប្រភពទុន និងជំរុញការចូលរួមក្នុងខ្សែច្រវាក់ផ្គត់ផ្គង់អន្តរជាតិ។

ដំណោះស្រាយគណនេយ្យឌីជីថល និងស្តង់ដាររាយការណ៍សមស្រប ក៏ត្រូវបានចាត់ទុកថាជាឧបករណ៍សំខាន់ក្នុងការពង្រឹងតម្លាភាពហិរញ្ញវត្ថុ ការជំរុញសហគ្រាសក្នុងវិស័យក្រៅផ្លូវការឱ្យចូលមកក្នុងវិស័យផ្លូវការ និងការលើកកម្ពស់កំណើនសេដ្ឋកិច្ចប្រកបដោយចីរភាព។

៤. និន្នាការថ្មីៗនៃការរាយការណ៍និរន្តរភាព

អ្នកចូលរួមក៏បានផ្លាស់ប្តូរទស្សនៈ និងពិភាក្សាអំពីការវិវត្តថ្មីៗក្នុងការរាយការណ៍និរន្តរភាព រួមមានជីវចម្រុះ មូលធនមនុស្ស និងការរាយការណ៍និរន្តរភាពក្នុងវិស័យសាធារណៈ។

កិច្ចពិភាក្សាទាំងនេះបានបង្ហាញពីការយកចិត្តទុកដាក់កាន់តែខ្លាំងលើព័ត៌មាននិរន្តរភាព ដែលមានវិសាលភាពលើសពីការប្រែប្រួលអាកាសធាតុ ព្រមទាំងតម្រូវការបន្តអភិវឌ្ឍសមត្ថភាព និងពង្រឹងកិច្ចសហប្រតិបត្តិការអន្តរជាតិ។

សារៈសំខាន់ចំពោះវិជ្ជាជីវៈគណនេយ្យ និងសវនកម្មនៅកម្ពុជា

លទ្ធផលនៃកិច្ចប្រជុំនេះបានបង្ហាញពីសារៈសំខាន់កាន់តែខ្លាំងនៃការពង្រឹងសមត្ថភាពវិជ្ជាជីវៈគណនេយ្យ និងសវនកម្ម ការលើកកម្ពស់គុណភាពរបាយការណ៍ហិរញ្ញវត្ថុ និងរបាយការណ៍និរន្តរភាព ព្រមទាំងការអភិវឌ្ឍធនធានមនុស្ស ដើម្បីឆ្លើយតបទៅនឹងតម្រូវការ និងការវិវត្តនៃស្តង់ដារអន្តរជាតិ។

 ការចូលរួមរបស់ លោក នៅ រ៉េមី បានផ្តល់ឱកាសឱ្យ វ.គ.ស.ក. តាមដានការពិភាក្សា និងការវិវត្តនៅកម្រិតអន្តរជាតិ ដែលពាក់ព័ន្ធនឹងវិជ្ជាជីវៈគណនេយ្យ និងសវនកម្ម ជាពិសេសក្នុងវិស័យការរាយការណ៍និរន្តរភាព របាយការណ៍ហិរញ្ញវត្ថុ និងការកសាងសមត្ថភាពសម្រាប់សហគ្រាសធុនមីក្រូ តូច និងមធ្យម។

វ.គ.ស.ក. បន្តប្តេជ្ញាចិត្តក្នុងការចូលរួមអភិវឌ្ឍវិជ្ជាជីវៈគណនេយ្យ និងសវនកម្មនៅកម្ពុជាឱ្យមានសមត្ថភាព និងការត្រៀមខ្លួនសម្រាប់អនាគត តាមរយៈកិច្ចសហការជាមួយនិយ័តករគណនេយ្យ និងសវនកម្ម (ន.គ.ស.) និងភាគីពាក់ព័ន្ធនានា ដោយស្របតាមការវិវត្ត និងឧត្តមានុវត្តន៍អន្តរជាតិ។